استعجلت أسيف الرحيل ....... [الأرشيف]

مشاهدة النسخة كاملة : استعجلت أسيف الرحيل .......

أسيف

03-13-2009, 07:20 AM

استعجلت الرحيل .........

ترن ترن .,,,

أسيف : ألو ..

مونة : السلام عليكو ايه يا بنتي ..انتي مفيش غيرك بيرد على التليفون

أسيف : هههههههه و عليكم السلام.. أخباراتك و أخباركوا كلكوا ؟؟؟

مونة : ا لحمد لله ..بصي من غير كتر كلام....فاضية الأسبوع الجاي ...

أسيف بنبرة تهكم : خير ...هاتي اللي عندك و بلاش لف و دوران ...

مونة : بصي يا سوسو الرياضة و الشباب عاملة أسبوع كدا لنشاط ترفيهي ..

أسيف : فين ؟؟؟

مونة : كايرو يا جميل ...

أسيف : اه قولتيلي ..طب حلو ...جت في وقتها بس لما أشوف العالم اللي هنا تقولي ايه ...

مونة : يا بنتي دي سيبيها عليا عشان تعرفي أخت مرات أخوكي مش عيقة ..ها .أنا كلمتي سيف على رقبتي و عدي الجمايل يا بيضا ههههههه...

أسيف : يا عيني عليكي يا مونة ....طب يعني اشمعزى أنا ههههههههه

مونة : بلاش شغل التقل دا لحسن و ربنا أرجع في كلامي

أسيف : و الله لقول أخويا ....و ساعتها نخسر بعض هههههههههههههههههههههه ....

مونة : كدا برده ....لا للنسب في وقت الترفيه يا أسيف .....أنا حبيت نهيص مع بعض و من الاخر عايزة صحبة حلوة ..

أسيف بتخابث : تقصدي مين ؟؟؟

مونة : ياربي منك ..أكيد مش إنت يا أسيف هههه....

أسيف: ماشي ...ما علينا ... أنا .معاكي..

مونة : طيب ...جهزي نفسك السبت إن شاء الله هنسافر ..

أسيف: على بركة الله ....

مونة : يلا بقى أقولك سلام

أسيف : و سلامين عليكي و على اللي جابوكي ههههه...

قفلت مونة السماعة ..و على اللي حصل لأسيف ....قعدت مع نفسها تتدبر تصاريف القدر معاها .....

السفر ....و ألف اه من السفر ......

افتكرت حالها في المسافة ما بين العريش و بئر العبد .....عادة أسيف في الجزء دا من السفر بتنتابها العديد من المشاعر المختلطة ...العديد من الأفكار الغريبة ...العديد من المعاني ....و دا غير تصفحها لأوجه الصحبة المسافرة معاها ..........

افتكرت أسيف شكلها و هيا بتذرف الدموع و بتحاول تداريها عشان محدش يلحظ من الركاب اللي حوليها ....استرجعت كل معاني القرب من الله في تلك اللحظات و قد ايه السفر بالنسبة ليها نوع من العبادة ..يمكن مبتقدرش تخشع أو تجيب الدرجة دي من القرب بكتر صلاة أو قراءة قران أو غيره من العبادات اللي الكل عارفها .....

يا سلام على منظر الصحراء .. بيفكر الإنسان ببدايته و إنه من التراب و إلى التراب .....تبص كدا من الزجاج الأمامي للتاكسي المرسيدس ...تلاقي قدامك زي وراك ......ههههههههه ...
.صحراء +صحراء= برده صحراء .....

تسترجع أسيف كل المراحل اللي فاتت من عمرها و تتخيل حالها ايه هيكون بعد مرور قد العمر اللي فات ...و تحس بمدى تقصيرها و قد ايه رحلة الإنسان على الأرض قصيرة مهما كان الإنسان شايفها طويلة و بيضلل نفسه بطول الأمل ...

ترجع الذاكرة لوراء شوية ....و أسمع صوت اللي قالي الأبيات دي و حفظتها منه

يا نفس قد أزف الرحيل ...و أضلك الخطب الجليل
يا نفس لا تركني و لا يلعب بك الأمد الطويل

تلف بعينها يمين و شمال و تحاول تدقق في تعابير الركاب اللي حوليها و تقول يا ترى أنا بس اللي حاسة بكدا و لا فيه غيري حاسس بكدا و ..... ترتاح للبعض و تخاف من البعض و تقول يا ترى ايه حكاية كل راكب و يا ترى ليه مسافر؟؟؟

...و تحدث نفسها وتقول: عظيم ياربي بكل شئ ..إنت وحدك اللي عالم الغيب و عالم اللي في قلب كل إنسان و ايه اللي بيدور في عقله ....و عارف كل واحد عايز ايه ....صحيح ما بنعظم على اللي خلقنا ...

. و تتعجب أسيف شوية و تشطح بالتفكير و تناجي ربنا : يعني يا ربي إنت دلوقتي معانا ...و مع الناس في كل مكان و مع كل مسافر على وجه الأرض ........يا إلاهي سامحني و ارحم ضعف تفكيري و أخرجني من الدنيا و أنا في سلامة من ديني ...انصرني على ضعف نفسي ...تجاوز عن أخطائي و اغفر لي .....

إممممممممممممم. بتكلم نفسها .خلاص فكيها يا أسيف ...يلا قومي جهزي شنطتك ووضبي أغراضك ...دنتي هتغيري جو و هتشوفي ناس جديدة و أكيد هتطلعى بفايدة من السفرية دي .....

طب و النص التاني من السفر .....من بعد اجتياز كوبري السلام لحد القاهرة .....أوباااااااااااااااااا ....
....... الدنيا هنا بتبدأ تاخد ألوان ...تتلون و اللون الأخضر هوا الغالب . ....

و الصمت يبدأ يفك شوية ...... خلاص سبنا أرض الفيروووز و سبنا ريحة جوها المميزة بطابع خاص محدش يقدره غير المحب للأرض دي ......

.

اها ....سواق التاكسي بلهجته العريشية القاحلة الجافة :....ايش تسمعوا يا جماعة هههههههه.....
طبعا مفيش غيره ....هوا جورج و السوف و حنجرته المؤذية للأذن البشرية ...مش هنكر إن دماغى بتعلى مع المغنى دون مع إني مش بسمعله بس صدقوا اللي سموه سلطان الطرب ....

و في اللي لازم يسمع الركاب ...ميادة الحناوي ....و خصوصا أغنية اسمها مش فاكرة بس بتقول فيها بتحبني ولا الهوا عمره ما زارك ههههههههه ..و كإن الأغنية دي فرض عين يا أسمعها ا في الروحة ...يا أسمعها في الجيا ...

و أنا لسان حالى يقول ...يغمك يا شيخ بذوقك المنيل .....هههههههههه .....طب مفيش حاجة لكاظم الساهر ...ننسي عجرم .. ..عبد المجيد عبد الله .طب هاني شاكر ...طب إيهاب توفيق بحنجرته أبو زمارة على قولة أخويا هههههههههههههه...

.. ماشي ماله عبد الحليم ....مش مشكلة القديم و لا جورج و دوشة الراس .....

تسكت أسيف و تقول :: سيبك....خليكي في حالة الخشوع أحسن .....بدل ما أنا بتريق على ذوق السواق ....يعني بتكلم وأنا من حلاوة ذوقي .مثلا ...ههههههههههههههه....بحاول أكفر عن ذنبي في كلامي مع نفسي بحق السواق اللي مش عارفة أسيف اللي ليه دايما بتكون معاه قلبا و قالبا و تراقب كل سكناته من أول ما يحط ايده على الدركسيون و كإن بيني و بينهم تار بايت لا سمح الله ....ههههههههههههههههه...

و يجي السواق على دخلة العاشر من رمضان ,,,,,يكح كحة تزلزل المرسيدس باللي فيها ...و يفوق النايم و يصحي الصاحي لحسن ينسوا يدفعوا الأجرة ههههههههه....و يكمل صاحبنا بصوتة الحنون ....ألف حمد الله على السلامة يا جماعة و عينه ترمق الركاب ....و بيقول في نفسه ......ادفعوا ...يا ولاد ......... واخدينها نوم ...و أنا عيني متبتة قدام خايف لضيع و أضيعكوا بشربة ميا ......هههههههه

كفاية كدا ....و خلى جزء أحتفظ بيه لنفسي ....

هااااااا يلا يا أهل حدوتة .....عايزة أعرف السفر بيعنيلكوا ايه ؟؟؟ و اتكلموا ...و بلاش البخل ...و أنا سيد من يسمع بس طبعا هرد عليكم بعد ما أرجع من السفرية دي .......

ودمتم سالمين

أسيف

http://www.picamatic.com/show/2009/03/13/07/58/2791407_498x686.jpg

محمد فخرى

03-13-2009, 09:35 AM

ترجعى بالسلامه اسيف

ايه ده انتى خليتى حاجه لحد يقولها؟؟؟؟؟؟

بجد بجد ولا اروع

يا ريت كل حد فينا ...يكتب حاجه بس انا مش باحب السفر

تقبلى مرورى

إسلام عابد

03-13-2009, 09:49 AM

أسيف
بجد بجد غلبتي أي كلام ممكن نقوله
إيه ده كلو
بس سؤال إزاي إنتي بتقولي فوق الشباب والرياضه
وبعد كده بتقولي سواق تاكسي وأجره
موش موهم
المهم تيجي بالسلامه
وبجد المنتدى هيضلم من غيرك

هاجر الشوربجى

03-13-2009, 09:59 AM

هيثم الشبت

03-13-2009, 01:36 PM

ياسرأبوعاصي

03-13-2009, 02:44 PM

تسلمى على القصة الجميلة
دائما متميزة

م/عصام الشبت

03-13-2009, 02:50 PM

rana

03-13-2009, 02:53 PM

انا بعشق حاجه اسمها سفر ورحلات
وببقى مبسوطه اوى وانا مسافره
ومبحسش بالوقت ولا اى حاجه
وخاصه لما ببقى مع اصحابى
بجد السفر ده متعه عندى
ويارب تنبسطى فى رحلتك وترجعلنا بالسلامه

عبد الهادى

03-13-2009, 05:52 PM

يا نفس قد أزف الرحيل ...و أضلك الخطب الجليل
يا نفس لا تركني و لا يلعب بك الأمد الطويل
انا بموت فى سفر ورحلات
ولازم اسبوع كل فتره تكون خارج العريش
انا يمكن عمل تقرير بالصور ل رحلة الاحلام والسحر والنيل من العريش الي مدن اسوان والاقصر

http://www.hadoota.com/vb/showthread.php?t=600

تسلمى أسيف على القصة الجميلة
ويارب تنبسطى فى رحلتك وترجعلنا بالسلامه
دائما متميزة

Basmala

03-14-2009, 03:11 AM

أسيف

03-20-2009, 10:36 PM

ترجعى بالسلامه اسيف

ايه ده انتى خليتى حاجه لحد يقولها؟؟؟؟؟؟

بجد بجد ولا اروع

يا ريت كل حد فينا ...يكتب حاجه بس انا مش باحب السفر

تقبلى مرورى

الله يسلم حضرتك أستاذ محمد.
أشكرك للمشاركة الكريمة ....
و السفر فيه من العظات و العبر لمن يتأمل ...

ودمتم سالمين

أسيف

أسيف

03-20-2009, 10:44 PM

أسيف
بجد بجد غلبتي أي كلام ممكن نقوله
إيه ده كلو
بس سؤال إزاي إنتي بتقولي فوق الشباب والرياضه
وبعد كده بتقولي سواق تاكسي وأجره
موش موهم
المهم تيجي بالسلامه
وبجد المنتدى هيضلم من غيرك
الله يسلمك ....
طب خد الجواب يا سيدي ...

أنا أفهمك يا ابن الجيران ....
أنا بتكلم عموما عن السفر و اللي بيحصل فيه إجمالا ....
سوبر جيت و لا تاكسي ....كله سفر ههههههه....

المهم يعني اشتريتوا شمع من بعدي ...ههههه...

أشكرك يا إسلام لتفاعلك الصادق و الكريم ...

ودمتم سالمين

أسيف

أسيف

03-20-2009, 11:07 PM

شكرا يا أسيف عالموضوع الرائع ده
بجد انا بحب السفر قوى ومبحسش باى تعب
من السفر .
ولما بكون مسا فرة مع اهلى بحس سعادة
كبيرة ومابحسش ان فى حاجة نقصانى
وبكون سعيدة برضو لما بسافر فى رحله
مع الجامعة بس بفضل متنحة هههههههههههه
لغاية ما أ وصل مش انطواء ولا حاجة بس
مبحبش اللى بيحصل فى الاتوبيسات البنات والاولاد
بيقعدوا يغنوا مع بعض ويسيبو اماكنهم يتحركوا داخل
الاتوبيس .......... وانتى فاهمة بقى
اما انا بفضل فى مكانى بتفرج عالطريق وبردو
بحس متعة السفر وبشوف حكمة ربنا اللى خلق
كل شئ ووضعه فى مكانه وبحمد ربنا عالنعم
اللى احنا عايشين بيها
تسلمى يا أسيف
تقبلى تحياتى

صحيح السفر مع الأهل ليه نكهة خاصة و ليه طابع مميز ....

و كمان برده السفر مع الصحبة الطيبة ملهاش حل ....

و كمان رحلات الكلية خطيرة ...بس لما الناس فيها تهيص بالمعقول ...

على كل حال ....السفر أكيد بيمثل شئ و معنى معين لكل إنسان فينا ..

أسعدني جدا تواجدك في موضوعي و نورتي يا صحفية السفر و اللي بيسافروا

ودمتم سالمين

أسيف

أسيف

03-20-2009, 11:10 PM

http://img519.imageshack.us/img519/9675/12wfz8.gif

بجد الواحد مش عارف يقول ايه

انتى قولتى اللى ما يخطرش على البال

انا بحب السفر جدآ جدآ

وبالذات لما نكون جماعه مع بعض

ربنا يرجعك بالسلاااااااامه

الحمد لله رجعنا بالسلامة و ربنا يرد كل غائب لأهله بخير و سلامة ..
لك مني جزيل الشكر لمرورك الكريم و تفاعلك الصادق ....

ودمتم سالمين

أسيف

أسيف

03-20-2009, 11:13 PM

تسلمى على القصة الجميلة
دائما متميزة

ههههه,,,,إمممممممم طيب ...قصة جميلة ...
مسمعناش يعني رأيك في السفر ,,,,
على كل ...أسعدني جدا تواجدك الكريم و العطر في موضوعي يا ياسر ..

ودمتم سالمين
أسيف

أسيف

03-20-2009, 11:20 PM

بصى يا سوسو دا اسم الدلع بتاع السفر اكيد السفر جميل جدا وبيعلم الواحد حاجات كتير

ولما ترجعى بلسلامة من الرحلة نعقد ونكحى هههههههههههه
بس انا ساكن جنب الشباب والرياضة معرفش انة فى رحلة ههههههههههههه
طب قولينا واحنا نطلع معاكى
عموما انتى كلامك لية مضمون تانى
بس بصراحة اليوم الجمعة ولسة متغدى فراخ وانتى عارفة الفراخ بتعمل اية فى الواحد
ونفسى اعرف اجابة السؤال دة يا اسيف
هو لية اهل العريش لازم يا كلو فراخ يوم الجمعة ههههههههههه
ارجو ان تتقبلى مرورى

ولك منى ارق التحايا يا اسيف

هههههههههههههههههههههههههههه....و الله ياريت كل حدوتة كانت معايا ....
بجد أسبوع خطير و اتعلمت فيه أشياء جديدة و المكان كان تحفة و كان فوج شمال سيناء عشرة على عشرة .....بس نفسي أفهم هما اللي من المحافظات التانية ليه لحد دلوقتي مفكرينا عايشين في خيم ....ههههههههه ,,, .......

اه الفراخ يوم الجمعة يا باش مهندس عصام ...يمكن عشان يوم مبارك فنفحات اليوم دون تعمل مناعة ضد أنفلونزا الطيور و كمان النهرضة في قرية حدوتة اتغدينا فراخ ....شكل الموضوع في إن .....و الله أعلم ....هههههههههههه...

أسعدني جدا جدا تواجدك و مرورك العطر و المميز في الموضوع باش مهندس عصام ...

ودمتم سالمين

أسيف

أسيف

03-20-2009, 11:23 PM

انا بعشق حاجه اسمها سفر ورحلات
وببقى مبسوطه اوى وانا مسافره
ومبحسش بالوقت ولا اى حاجه
وخاصه لما ببقى مع اصحابى
بجد السفر ده متعه عندى
ويارب تنبسطى فى رحلتك وترجعلنا بالسلامه

أنا برد عليكي يا رنا وتنحت و بدأت أفصل ههههههههه
الحمد لله كانت رحلة حلوة جدا و أضافت ليا الكثير ...

أسعدني جدا تواجدك في موضوعي و نورتي ...

ودمتم سالمين

أسيف

أسيف

03-20-2009, 11:32 PM

[quote=عبد الهادى;15717]يا نفس قد أزف الرحيل ...و أضلك الخطب الجليل
يا نفس لا تركني و لا يلعب بك الأمد الطويل
انا بموت فى سفر ورحلات
ولازم اسبوع كل فتره تكون خارج العريش
انا يمكن عمل تقرير بالصور ل رحلة الاحلام والسحر والنيل من العريش الي مدن اسوان والاقصر

http://www.hadoota.com/vb/showthread.php?t=600 (http://www.hadoota.com/vb/showthread.php?t=600)

تسلمى أسيف على القصة الجميلة
ويارب تنبسطى فى رحلتك وترجعلنا بالسلامه
دائما متميزة [/quote

صحيح الإنسان بيحتاج كل فترة لتغيير الجو عشان يجدد نشاطه و يديه دفعة تمام للأمام ....
و عقبال متتسهل رحلة الأقصر و أسوان ....
أما من حيث الإنبساط ....فالحمد لله ...كان أسبوع وهم و بجد كانوا يومين حلوين و مش عارفة ليه عدوا بسرعة ..... و تشكروا لدعواتكم الطيبة ...

بجد أسعدني تواجدك الكريم في الموضوع عبد الهادي و زدت الموضوع نورا بمرورك العطر

ودمتم سالمين

أسيف

أسيف

03-20-2009, 11:40 PM

ياااااااه السفر ..جيتى على الجرح يا جميل ..
انا بحب عموما الخروج والفسح والسفر بذاااات ..
ورغم انى مابشاركش فى اى هيصة وببقى فى حالى ..
انتى عارفة طبعا ..ههههههههههه
لكن بستمتع جدا بالفرجة على اللى بيهيصوا وعلى
المناظر الجميلة فى الطرق والاماكن المختلفة ..
تسلملنا ايديكى ومواضيعك السكرة يا اسيف يا سكر ..

هههههههههههه.....طبعا عارفة ...إنتي هتقوليلي ...
و خير شاهد رحلة اسكندرية .....
عارفة أنا برد عليكي و خلاص منهارة تماما ...فصلت و نفسي أقول كلام حلو بس بأمانة عايزة أخلص من موال السفر دون ههههههههههههه ....

بأمانة ربنا ردك إنتي اللي زي السكر و نورتي يا أحلى بسومة الموضوع و اعذري فصلة دماغي

و بشكر كل اللي ردوا على الموضوع دون بالذات جزيل الشكر ....

ودمتم سالمين

أسيف

احمد عاشور

03-21-2009, 12:42 AM

هميس

03-21-2009, 03:30 PM

أسيف

03-22-2009, 09:29 AM

اولا يااسيف احب اقول ليكى حمدلله على السلامه علشان انا شوفتك النهارده والحمدلله
اما السفر بيعنينى ايه
هو شئ بحس فيه بالغرابه ونفس الوقت بحب ابعد عن الناس علشان اريح الاعصاب والوش الى انا فيه والحاجه الى حلوه عندى اما اسافر القاهره بكون فى بيتى علشان انا من هناك واما اجى العريش بكون برده فى بيتى علشان عندى حاجه سهله على طول اسكن فيها بس الراحه الكمله الى انا بحس بيها فى القاهره رغم الوش والدوشه الى هناك
واسف انى طولت عليكى
تقبلى مرورى

أسعدني جدا مشاركتك أحمد عاشور و صحيح كلامك ..أحيانا السفر بيبعد الإنسان عن وشوش مش عايز يشوفها ,,,و كمان تغيير الوجوه رحمة .... و التجديد حاجة كويسة بتغير نفسية الإنسان ......

مشكور جدا لمرورك الكريم و نورت الموضوع

ودمتم سالمين

أسيف

أسيف

03-23-2009, 01:57 AM

يا نفس قد ازف الرحيل**واضلك الخطب الجليل

يا نفس لا تركني**ولا يلعب بك الامد الطويل

يعني لي السفر جريان الماء في البحور للتجديد والتغير والطهاره للنفس باليمان انها رحله ولابد الوصول زي دنيتنا ....هي كمان سفريه ولابد الوصول للدار الاخره

اللهم ارزقني واياكم حسن الخاتمه وابعثنا مع الصالحين

اللهم أمين ...
صراحة أسعدتني جدا جدا جدا مداخلتك الكريمة و المميزة و تفاعلك الصادق يا هميس و زاد الموضوع نور بمرورك العطر

ودمتم سالمين

أسيف

المايسترو

03-27-2009, 02:00 AM

http://farm3.static.flickr.com/2107/2459557756_1d2f19a60b_o.gif (http://www.bibo4pc.com/)

http://farm3.static.flickr.com/2369/2458724289_012850f071_o.gif (http://www.bibo4pc.com/)

أسيف

04-02-2009, 07:58 PM

http://farm3.static.flickr.com/2107/2459557756_1d2f19a60b_o.gif (http://www.bibo4pc.com/)

http://farm3.static.flickr.com/2369/2458724289_012850f071_o.gif (http://www.bibo4pc.com/)

أشكرك لمرورك الكريم مايستروا ...

ودمتم سالمين

أسيف

عيون المها

04-02-2009, 08:54 PM

يا نفس قد أزف الرحيل ...و أضلك الخطب الجليل
يا نفس لا تركني و لا يلعب بك الأمد الطويل

لكن السفر برده بيخلينا نتامل الدنيا كويس ونعرف قد ايه احنا فى نعمه

أسيف

04-02-2009, 09:00 PM

يا نفس قد أزف الرحيل ...و أضلك الخطب الجليل
يا نفس لا تركني و لا يلعب بك الأمد الطويل

لكن السفر برده بيخلينا نتامل الدنيا كويس ونعرف قد ايه احنا فى نعمه

مزبوووووط كلامك ...صحيح كمان السفر بيخلينا نتأمل حال الدنيا ...
أسعدني جدا مرورك العطر و اللطيف يا عيون المها ونورتي الموضوع ..

ودمتم سالمين

أسيف

أميرة الصباح

04-06-2009, 11:05 PM

السفر جميل جدا بس العريش اجمل لما اسافر واسيب العريش بزعل اوى واتمنى ارجع العريش بسرعة والسفرية تخلص مع ان السفر ممتع احيانا
شكرااااااااااا لموضوعك اسيف

أسيف

05-20-2009, 03:53 AM

السفر جميل جدا بس العريش اجمل لما اسافر واسيب العريش بزعل اوى واتمنى ارجع العريش بسرعة والسفرية تخلص مع ان السفر ممتع احيانا
شكرااااااااااا لموضوعك اسيف

منورة الموضوع يا صبوحة ......و العريش كلها تزعل يوم ما تسيبها ...

أسعدتني مداخلتك الطيبة يا صباح و يارب دايما تروحي و ترجعي من أي سفرية بالسلامة

ودمتم سالمين

أسيف

emad kamal

05-20-2009, 04:09 AM

ياااااااااااااااااااااااااااه...السفر.....
انتى جيبتى موضوع كالعاده...عايز عصف ذهنى....على رأى اساتذتنا...
المهم يا أسيف ان السفر ده....عالم تانى...ودماغ تانيه خالص..وطبعا مافيش سفريه اخت التانيه...لأ ده كل سفريه فيها الجديد وفيها الحلو وفيها الوحش...
انا عامه بحب السفر اوى...وبحب أشوف كل جديد...ادمان سفر من الاخر...منيم مااسمع سفر وينفع اسافر تلاقينى ناطط على طول فى السفريه دى..

لكن بجد بحب اوى ساعه الرجوع..دى واقعد ااقول ها قربنا نوصل اهه...ولما ندخل بوابه العريش بحس روحى رجعتلى مع انى بحب السفر اصلا بس برده احساس العوده ده...ممتع اوى......واقول الحمد لله تمام...الواحد كلها نص ساعه بالكتير ويحتضن سريره العزيز....بجد بيت الواحد وسريره ده..راحه مابعدها راحه...وخصوصا انى موش بعرف انام فى السفر...الا حالات قليله اوى...وخاصه لو كان رحله ومتعبه طبعا وارهاق...
المهم انا بساااااااااااااافر كتير اوى....بسافر مع الاسره سنويا للمنصورة....
ومافيش سنه كمان بتعدى غير فى رحله او اتنين على الاقل ده ازا ماكنش 3 كمان...فى السنه...
طبعا الطريق والتفكير ..بيبقى على حسب نوع السفر...
يعنى السفر فى الاجازه للمنصورة ...غير السفر فى رحله...وكمان الرحله الطويله غير القصيره...رحله الكليه غير الرحلات التانيه....ورحلات حدوتة والمسئولية كلها والتفكير فى كل حاجه....وشيل الهم...أكيد غير برده الرحلات التانيه...
وكله كوم وسفريات الجيش دى كوم...من ابشع سفرياتى....هاهاهاهاها...لانهم كانوا 5 سفريات عذاب...وقلق...وتعب.....
اخيرا...اهم حاجه فى السفر بجد الصحبه اواللى انتى مسافره معاهم...
والحمد لله انا كل الرحلات اوالسفريات ببقى مبسوط او سعيد...معادا الجيش طبعا...هاهاهاهاهاا....
ومن اسعد سفرياتى...على الاطلاق...الاقصر واسوان..فى الثلاث مرات...بجد كل مره كان فى حاجات جميله جدا وصحبه مختلفه...وممتعه جدا ...علشان كده موش بتردد اطلعها كتير...مع انها متعبه من كل حاجه...
وكمان الاسكندريه وفسحتها...
والقاهره ولعبها وتنطييطها فى دريم...
ومطروح وجمال البحر...والطبيعه...
وبورسعيد ...ياااااااااااااه...
والاسماعيليه وخط القنال كله...
والمنصورة بلدى واهلى....
ياااااااه فكرتينى بالسفر....هاهاهاهاهاا
يالا ...كلها شويه صغيرين ونسافر فى الاجازه...

شكلى طولت اوى....بس بجد لو قعدت اتكلم من هنا لسنه قدام موش هاخلص كلام عن السفر والرحلات والزكريات الحلوه....
هاتخلينى اقعد اتفرج على الصور كلها دلوقتى...ومش هانام لحد بعد بكره على مايخلصوا...هاهااهاهاها...

على العموم دمتم مسافرين ومبسوطين...

أسيف

05-20-2009, 04:37 AM

emad kamal

05-20-2009, 04:49 AM

مداخلة أكثر من رائعة يا عمدة ....صحيح انت مشهوووووود ليك بإدمان السفر.. .....و صحيح لقطة لما كلنا بنيجي نفصل و نقول جملتك "الواحد كلها نص ساعه بالكتير ويحتضن سريره العزيز"......

أسعدني جدا تفاعلك الصادق و الحمد لله معدناش جيش يعلم علينا بذكريات وحشة و مؤلمة هههههههههههههههههههه.....

يلا نصيبك كدا معايا ....لازم أهزر معاك يا عماد ......

ودمتم سالمين

أسيف

هاهاهاهاها....لا ولا يهمك خلاص اخدت الشهاده...موش فارقه بقى...قولى اللى تقوليه...وهزرى زى مانتى عايزه...
وانتوا برده حقكم وصلكم...ولا ايه...يعنى خالصين...هاهاهاهاها...